Wiil Soomaali Ah Oo Lagu Tuhmayo Inuu Yahay Jacaylka Gabar Wariye Kenyaan Ah Oo Hadlay

Cali Nuur Maxamed oo ah wiil Soomaali ah oo looga shakisanyahay inuu yahay ninka qaba gabadha Wariyaha Kenyaanka ah ee lagu magacaabo Betty Kyalo ayaa ka hadlay wararka xanta ah ee sheegaya inuu yahay seeyga Betty Kyalo.

Cali Nuur, ayaa si cad u beeniyay inuu yahay ninka qaba Betty Kyalo, isagoo waxba kama jiraan ku tilmaamay tuhunkaas.

Qoraal uusoo dhigay bartiisa Facebook-ga ayuu ku beeniyay inay wax kala dhexeeyaan Betty, isagoona marin habaabin ku tilmaamay wararka xanta ah ee ay faafinayaan Kenyaanka ah oo uu sheegay inay ka dambeeyaan shaqsiyaad leh dano xun.

“Waxaa jiray warar la isla dhexmarayay oo ku saabsan noloshayda shaqsiyadeed maalmihii la soo dhaafay. Kenyaanka waxay ila xiriirinayaan wiil Soomaali ah oo ay sheegtay wariyaha telefishinka NTV Ken Mijungu, kaasoo ay sheekadiisa taabatay Betty Kyallo iyo Dennis Okari,” ayuu ku yiri qoraal uusoo dhigay bartiisa Facebook-ga.

Waxa uu xusay inuusan farxad ka helin qoysaska burburay sidaa darteed dadka Kenyaanka ah ay u baahanyihiin inay ogaadaan runtaas.

“Sheekada la faafinayo malahan xaqiiq, waxana faafinaya shaqsiyaad leh dano shaqsiyadeed oo xun. Farxadeydu kama timaado qoysaska burburay,” ayuu yiri Cali Nuur.

Waxa uu weydiistay kuwa faafinaya wararka xanta ah ee inuu ahaa jacaylka Betty ay joojiyaan sheekadaas maadaama uu leeyahay qoys uu jecelyahay.

“Sidaa awgeed, waxaan weydiisanayaa kuwa sheegaya inaan ahay wiilka Soomaaliga ah ee qarsoodiga ah inay ixtiraamaan qoyskeyga, qoyska Kyallo iyo qoyska Dennis Okari. Fadlan , ma ihi wiilka Soomaaliga ah,” ayuu qoraalkiisa ku yiri Cali Buur,

Waxaa dhawaan sawiradiisa lagu dhex arkayay Guruubyada Facebook-ga, iyadoo shaki laga qabo inuu noqon karo ama uu yahay yarka Soomaaliga ah ee la haasaawaya gabadha wariyaha Kenyaanka ah ee Betty Kyalo.