Abdirahman waa wiil soomaaliyeed oo kamid ah wiilsha ka caawiya qoyskooda dhanka cunto karinta waqtiyada adag oo Soonku ka midka yahay.
”Waqtigii hore noloshu way adkayd, hooyadu ilmaha iyada ayaa xambaari jirtay, cuntada Karin jirtay, biyo soo dhaamin jirtay iyada oo ilmo xambaarsan, waxaa la dhihi karaa darbi ayaa ka dhisnaa ragga iyo dumarka dhexdooda, balse hadda hawshii guriga, shaqadii way qaybsan tahay, gabadhii shaqo ayay aadaysaa, way xanuunsan kartaa ama way cuslaanaysaa uur ayay yeelanaysaa, markaa tani waa xirfad noololeed meel aad uga dhuuman karto ma jirto.”
sidaas waxa BBC-da u sheegay Abdirahmaan oo ah wiil soomaaliyeed oo aannu kula kulannay gurigiisa isaga oo ku jira caawimada reerkiisa xagga cunta karinta.
Dhaqanka Soomaaliga waxaa kamid ah in wiilasha laga ilaaliyo in ay u dhawaadaan goobaha cuntada lagu kariyo ee jikada, haddii aad isku daydo in aad adeeg u doonato jikada, markiiba waxaa dhagahaaga ku soo dhacaya ereyga (Qorqade) oo ah qof ka takooran ragga intiisa kale.
Haweenka waxa laga dhaadhiciyay in ninka qaba aan lagu arkin shaqada guriga ugu mihiimsan sida, cunto karinta, dhar dhaqista iyo ka shaqeynta nadaafada carruurtiisa.
Culayska kaga yimaada haweenka kalinamada shaqada guriga waxay horseeddaa in qoysasku marka danbe burburaan, arinkan waxaa si wayn looga dareemay qurbaha, markii loo tagay bulsho si siman rag iyo dumar uga wada shaqaysta gudaha iyo dibaddaba.
Waxaa jira dhalinyaro Soomaaliyeed oo fahmay in nolosha qoysku ku xiran tahay kawada shaqaynta adeegyada nolosha sida in layska caawiyo cunta karinta waqtiyada adag Cabdiraxmaan wuxuu aaminsan yahay.
”Anigu waxan aamin sanahay in aan hawsha guriga kabadsan karo xaaskayga, wax walba oo gurigaaga kuu yaalla hadii aad ka baahatid adiga ayaa isgabay, waqtigan hadda la joogo waxaa lays waydiiyaa guurka ka hor cunto makarin kartaa, haddii guriga iyo ilmaha lagaaga tago maxaad ku jawaabaysaa.”
Dadka soomaaliyeed waxay kamid yihiin dadka uu dhaqankoodu xoogga yahay, diinta Islaamka ayaa faraysa dhammaan raggu in ay u adeegi karaan reerkooda, waayo diintu waxay masuuliyadda saartay ragga.
BBC
