Dacarta “Aloe Vera” waa dhir daaweed aad u qiimo badan oo ay dhakhaatiirtu isku waafqsan yihiin waxtarkeeda.
Dacarta waxay isku qabiil yihiin tuunta iyo basasha oo iyagane leh faaidooyin aad u badan.
Inkastoo dacarta loo adeegsado xanuuno iyo cillada kala duwan, waxaan rabaa in aan qoraalkaan ku soo aruuriyo wixii watar la hubo oo la rakay leh oo ku salaysan cilmibaaris.
Dacarta waxaa ku jirto illaa 200 oo maaddo waxtar leh oo ay ka mid yihiin fitamiinno, macaadin, borotiin, dheecaanno jirka u baahan yahay, carbohydrate iyo dufan.
Dacarta waxay daawada kaga jirtaa dhareeraha, waxaana dhareerahaas la qiyaasaa in la adeegsan jiray kumanaan sano ka hor oo ay qawmiyadu kala duwan aaminsanaan jireen waxtarkeeda.
Faa’idooynka dacarta waxaa ugu muhiimsan:
Dacarta waxaa ka buuxdo fitamiino iyo maadooyin jirka uusan ka maarmin oo aad u badan, waxaana ka mid ah fitamiinka A, C,E, Folic acid, Choline, B1, B2, B3, B6 iyo B12. Waxaa kaloo ku jiro macaadinta muhiimka ah sida Calcium, Magnesium, Zinc, Chromium, Selenium, Sodium, Iron, Potassium, Copper iyo Manganese.
Dacarta waxaa ka buuxo waxyaabaha borotiinka laga sameeyo ee loo yaqaanno “Amino Acids” iyo waxyaabaha dufanka laga sameeyo ee loo yaqaano “Fatty Acids” waxaa dacarta laga helaa illaa 20 amino acid iyo 10 fatty acids, waana dhif in tiro intaas la eg laga helo geedo daaweed.
Dacarta waxay caawisaa dheefshiidka, dheefshiid xumada waxaan ognahay in ay ka dhashaan cudurro badan oo saameyn ku yeelan karo caafimaadka qofka.
Waxay kaloo dacarta leedahay faa’ido lala yaabo oo ah: haddii qofka uu shubmayo way istajinaysaa, hadduu qofka caloosha fadhisane way socodsiinaysaa, waxayna daawo u tahay xanuunka mindhicirrada kacsan “Irritable Bowel Syndrome”, xanuunka gaastirikada khaas ahaan boogta caloosha.
Dacarta waxay kaloo caloosha ku yaraysaa bakteeriyada jeermiska ah laakiin bakteeriyada nafciga leh way daysaa, meesha daawoyinka loo qaato infekshanka ay labada nooc ay bakteeriyadaba ay dilaan.
Sidaas owgeed waxaa jiro cabitaanno kal duwan oo laga sameeyo geedo daaweedka dacarta.
Dacarta waxay jirka ka saartaa qashinka iyo sunta, waxayna u fiican tahay dadka cillad ay ka haysato dhinaca qashin saarka sida dadka beerka ama kilyaha ka xanuunsan.
Cilmibaaris lagu soo daabacay joornaalka “British Medical Journal” waxay sheegtay in dacara ay leedahay faa’idooyin dhinaca caafimaadka wadnaha, maadaama ay yarayso kolestaroolka, waxayna kordhisaa qulqulka dhiigga, waxay kaloo kordhisaa awoodda xambaarista oksajiinta ee unugyada dhiigga cascas.
Qoraalka waxaa lagu soo gabagabeeyay in maadaama dacarta ay ku fiican tahay dhinaca kontoroolka cadaadiska dhiigga, yaraynta kolestaroolka iyo kordhinta qulqulka dhiigga ee xididada yaryar waxay yaraysaa halista wadna qabadka.
Dacarta waxay kobcisaa difaaca jirka, maado ku jirta dacarta ayaa waxaa la arkay in unugyada difaaca u qaabilsan jirka in ay aad uga shaqaysiiso o ay falgaliso, waxay kaloo la arkay in dacarta xilliga qandhada haddii la cabo in qandho jabis ahaan u shaqayso inkastoo aanan weli la fahansanayn qaabka ay qandhada u jabio
Dacarta waxay nafaqaysaa maqaarka jirka, waana sababta shirkado badan oo kareemyada sameeyaa iyo daawooynka oogada loogu talagalay ay asal uga dhigaan geedka dacarta, waxaa kaloo cilmibaaris lagu arkay in xanuuno maqaarka ku dhaco oo dhowr ah in dacarta lagu daaweeyo kuwaas oo ay ka mid yihiin: xanuunka Psoriasis, gubashada iyo dhaawacyada maqaarka.
Waxaa kaloo dacarta ay yaraysaa cuncunka iyo xasaasiyada maqaarka.
Maadaama dacartu ay 99% ay dareere tahay, waxay maqaarka siisaa qoyaan ka hortago kadkaduudka iyo kor qallaylka, waxaa kaloo loo adeegsadaa caga jeexjeexa, waxay kaloo kordhisaa qulqulka dhiigga xididada yaryar sidaan horay u soo sheegnay taasoo in si dhakhso ah dhiigga u soo gaaro maqaarka taasoo maqaarka siiso dhaldhalaal qurxoon.
Dacarta waxay yaraysaa lurka ama caabuqa “Inflammation”, sidaas awgeed waxay u roon tahay xanuunada lafaha ku dhaca sida roomaatisamka iyo riixa.
Dacarta waxyeello ma leedahay?
Dacarta lama cabo xilliga uurka, xilliga caadada, haddii aad Baabasiir qabtid, haddii xameetida ay jiran tahay iyo haddii beerka uu hawlgab yahay.
Qaabkee loo isitcmaalaa Dacarta?
Waa muhiim in aadan dareeraha dacarta aadan si toos ah u cabin iyadoo aan la soo marsiinin warshad ama la soo sifaynin, laakiin waad marsan kartaa maqaarlka, kalagoysyada.
Dacarta iyadoo cabitaanno laga dhigay ayaa lagu gadaa farmashiyada ama dukaamada qaar, haddii aad doonaysid in aad cabtid, waa in aad soo gadataa iyadoo la sifeeyay.
Source: Somalidoc
